shab-e-gham hujum-e-alam tauba tauba

shab-e-ġham hujūm-e-alam tauba tauba

aur aañsū bhī āñkhoñ meñ kam tauba tauba

shab-o-roz sahbā-e-ulfat kī mastī

haram meñ bhī yād-e-sanam tauba tauba

junūñ be-niyāz-e-makāñ hai to phir kyoñ

ye taḳhsīs-e-dair-o-haram tauba tauba

bhalā kyā ye ra.anā.ī-e-dahr hotī

na hote jahāñ meñ jo ham tauba tauba

do-ālam kī daulat mire dil kī qīmat

kahāñ ye kahāñ jām-e-jam tauba tauba

nigāheñ bachā kar vo un kā tabassum

karam-koshiyoñ meñ sitam tauba tauba

shab-e-gham hujum-e-alam tauba tauba

aur aansu bhi aankhon mein kam tauba tauba

shab-o-roz sahba-e-ulfat ki masti

haram mein bhi yaad-e-sanam tauba tauba

junun be-niyaz-e-makan hai to phir kyon

ye taKHsis-e-dair-o-haram tauba tauba

bhala kya ye ranai-e-dahr hoti

na hote jahan mein jo hum tauba tauba

do-alam ki daulat mere dil ki qimat

kahan ye kahan jam-e-jam tauba tauba

nigahen bacha kar wo un ka tabassum

karam-koshiyon mein sitam tauba tauba