shab-e-gham zabt-koshi se hum itna kaam lete hain

shab-e-ġham zabt-koshī se ham itnā kaam lete haiñ

jo dil meñ huuk uThtī hai kaleja thaam lete haiñ

na jaane kyuuñ nigāhoñ se gire jaate haiñ duniyā kī

gunah karte haiñ koī yā tumhārā naam lete haiñ

usī ko ehtirām-e-husn kahte haiñ haqīqat meñ

ham apne zikr se pahle tumhārā naam lete haiñ

nashāt-e-āshiyāñ kā raaz irfān-e-aqīdat hai

chaman kī pattī patī se tirā paiġhām lete haiñ

jinheñ nāzoñ se paalā ham ne āġhosh-e-mohabbat meñ

vahī gin gin ke badle ai dil-e-nākām lete haiñ

nasheman se haiñ saarī kaifiyāt-e-zindagī qaa.em

guloñ ke rang-o-bū se ham surūr-e-jām lete haiñ

dil-e-ġham-āshnā kī muztarib ghaḌiyāñ nahīñ kaTtīñ

chale aao ki ham baiThe tumhārā naam lete haiñ

hameñ ai 'zeb' qalb-e-māhiyat kī bhī to aadat hai

pareshānī se ham aksar sukūñ kā kaam lete haiñ

shab-e-gham zabt-koshi se hum itna kaam lete hain

jo dil mein huk uThti hai kaleja tham lete hain

na jaane kyun nigahon se gire jate hain duniya ki

gunah karte hain koi ya tumhaara nam lete hain

usi ko ehtiram-e-husn kahte hain haqiqat mein

hum apne zikr se pahle tumhaara nam lete hain

nashat-e-ashiyan ka raaz irfan-e-aqidat hai

chaman ki patti pati se tera paigham lete hain

jinhen nazon se pala hum ne aaghosh-e-mohabbat mein

wahi gin gin ke badle ai dil-e-nakaam lete hain

nasheman se hain sari kaifiyat-e-zindagi qaem

gulon ke rang-o-bu se hum surur-e-jam lete hain

dil-e-gham-ashna ki muztarib ghaDiyan nahin kaTtin

chale aao ki hum baiThe tumhaara nam lete hain

hamein ai 'zeb' qalb-e-mahiyat ki bhi to aadat hai

pareshani se hum aksar sukun ka kaam lete hain