shab-e-ghurbat mein jo KHushbu-e-watan pas aai

shab-e-ġhurbat meñ jo ḳhushbū-e-vatan paas aa.ī

der tak saañs nahīñ sirf tirī baas aa.ī

jo navishtoñ meñ matā’-e-do-jahāñ baTtī thī

mere hisse meñ yahī shiddat-e-ehsās aa.ī

koī ummīd hai mujh ko na koī andesha

aas aa.ī mire dil meñ na kabhī yaas aa.ī

jab khulā saañs liyā hai mahak uTThā hai mashām

ye mire haath 'ajab daulat-e-anfās aa.ī

jab bhī aa.ī hai kabhī us nigah-e-nāz kī yaad

shīsha-e-dil ke liye sūra-e-almās aa.ī

tū isī kulba-e-ahzāñ meñ paḌā rah ḳhurshīd

tujh ko kab sohbat-e-abnā-e-zamāñ raas aa.ī

shab-e-ghurbat mein jo KHushbu-e-watan pas aai

der tak sans nahin sirf teri bas aai

jo nawishton mein mata’-e-do-jahan baTti thi

mere hisse mein yahi shiddat-e-ehsas aai

koi ummid hai mujh ko na koi andesha

aas aai mere dil mein na kabhi yas aai

jab khula sans liya hai mahak uTTha hai masham

ye mere hath 'ajab daulat-e-anfas aai

jab bhi aai hai kabhi us nigah-e-naz ki yaad

shisha-e-dil ke liye sura-e-almas aai

tu isi kulba-e-ahzan mein paDa rah KHurshid

tujh ko kab sohbat-e-abna-e-zaman ras aai