shab-e-hangam-e-wahshat kya tan-asani khulegi

shab-e-hangām-e-vahshat kyā tan-āsānī khulegī

hamārī vaz' kī ḳhātir pareshānī khulegī

abhī kyā sā’at-e-avval meñ kuchh tā'līm hogā

nasha jab had se baḌh jā.egā hairānī khulegī

havā-e-sub.h-e-tāza kis badan kī muntazir hai

hameñ mā'lūm hai kis par farāvānī khulegī

nihāñ rakkheñge ham tum apne apne mausamoñ ko

jo Thahrāo nahīñ aaya to arzānī khulegī

hamārī ḳhaak ko ḳhāk-e-ravāñ rakkhā gayā hai

ye jitnā nam rahegī utnī āsānī khulegī

guzar jā.eñge ham jo us galī se ek pal meñ

to ham par zindagī bhar kī pashemānī khulegī

sab apnī apnī duniyā meñ bahut hī mutma.in haiñ

magar vo log kam haiñ jin pe vīrānī khulegī

hazāroñ rang meñ hai vo gul-e-tāza ki jo hai

pa qismat se hī ik lamha ko 'uryānī khulegī

shab-e-hangam-e-wahshat kya tan-asani khulegi

hamari waz' ki KHatir pareshani khulegi

abhi kya sa’at-e-awwal mein kuchh ta'lim hoga

nasha jab had se baDh jaega hairani khulegi

hawa-e-subh-e-taza kis badan ki muntazir hai

hamein ma'lum hai kis par farawani khulegi

nihan rakkhenge hum tum apne apne mausamon ko

jo Thahrao nahin aaya to arzani khulegi

hamari KHak ko KHak-e-rawan rakkha gaya hai

ye jitna nam rahegi utni aasani khulegi

guzar jaenge hum jo us gali se ek pal mein

to hum par zindagi bhar ki pashemani khulegi

sab apni apni duniya mein bahut hi mutmain hain

magar wo log kam hain jin pe virani khulegi

hazaron rang mein hai wo gul-e-taza ki jo hai

pa qismat se hi ek lamha ko 'uryani khulegi