shab-e-hayat mein qindil-e-arzu tera gham

shab-e-hayāt meñ qindīl-e-ārzū tirā ġham

sukūt-e-jāñ meñ farozāñ sadā-e-hū tirā ġham

ram-e-nafas meñ machaltī huī sadā tirā naam

rag-e-gulū meñ sulagtā huā lahū tirā ġham

harīm-e-zāt meñ raushan charāġh ke mānind

riyāz-e-shauq meñ naḳhl-e-subuk-numū tirā ġham

mire shu.ūr ke zindāñ meñ ik darīcha-e-nūr

mare vajūd ke sahrā meñ āb-jū tirā ġham

lagan koī bhī ho unvān-e-justujū tirā husn

suḳhan kisī se ho mauzū-e-guftugū tirā ġham

surūr-o-kaif kī sab mahfiloñ meñ dekh liyā

kahīñ sharāb tirā ġham kahīñ subū tirā ġham

ḳhayāl-o-fikr ke sab maktaboñ meñ pūchh liyā

matā.a-e-dānish-o-tahqīq-o۔justujū tirā ġham

samā'o-soz kī sab majlisoñ meñ DhūñD liyā

ma.āl-e-zikr-o-manājāt-o-hā-o-hū tirā ġham

haram meñ hirz-e-dil-o-jān-e-qudsiyāñ tirā naam

sanam-kade meñ barahman kī aarzū tirā ġham

sukūn-e-qalb jo sochā to sar-basar tirī yaad

nashāt-e-zīst ko dekhā to hū-bahū tirā ġham

ġham-e-jahāñ ġham-e-jānāñ ġham-e-digar ġham-e-ḳhvesh

jahān-e-ġham meñ har ik ġham kī aabrū tirā ġham

har ek ranj se guzre har ik ḳhushī se ga.e

liye phirā jinheñ ik umr kū-bakū tirā ġham

rahī na koī bhī hasrat ki rakh diyā maiñ ne

har ek jazba-e-dilkash ke rū-ba-rū tirā ġham

shab-e-hayat mein qindil-e-arzu tera gham

sukut-e-jaan mein farozan sada-e-hu tera gham

ram-e-nafas mein machalti hui sada tera nam

rag-e-gulu mein sulagta hua lahu tera gham

harim-e-zat mein raushan charagh ke manind

riyaz-e-shauq mein naKHl-e-subuk-numu tera gham

mere shuur ke zindan mein ek daricha-e-nur

mare wajud ke sahra mein aab-ju tera gham

lagan koi bhi ho unwan-e-justuju tera husn

suKHan kisi se ho mauzu-e-guftugu tera gham

surur-o-kaif ki sab mahfilon mein dekh liya

kahin sharab tera gham kahin subu tera gham

KHayal-o-fikr ke sab maktabon mein puchh liya

mataa-e-danish-o-tahqiq-o۔justuju tera gham

sama'o-soz ki sab majlison mein DhunD liya

maal-e-zikr-o-manajat-o-ha-o-hu tera gham

haram mein hirz-e-dil-o-jaan-e-qudsiyan tera nam

sanam-kade mein barahman ki aarzu tera gham

sukun-e-qalb jo socha to sar-basar teri yaad

nashat-e-zist ko dekha to hu-bahu tera gham

gham-e-jahan gham-e-jaanan gham-e-digar gham-e-KHwesh

jahan-e-gham mein har ek gham ki aabru tera gham

har ek ranj se guzre har ek KHushi se gae

liye phira jinhen ek umr ku-baku tera gham

rahi na koi bhi hasrat ki rakh diya main ne

har ek jazba-e-dilkash ke ru-ba-ru tera gham