shab-e-hijr aah kidhar gai kahun kis se nala kidhar gaya

shab-e-hijr aah kidhar ga.ī kahūñ kis se naala kidhar gayā

jo guzar ga.ī vo guzar ga.ī jo guzar gayā vo guzar gayā

jo tumhārī aañkh se gir paḌā jo tumhāre dil se utar gayā

vo ġharīb jīte-jī mar gayā vo kahāñ gayā vo kidhar gayā

koī apne bachne kā Dhab nahīñ koī zindagī kā sabab nahīñ

mire paas dil bhī to ab nahīñ vo idhar ga.e ye udhar gayā

koī dard ho to davā karūñ na bane davā to duā karūñ

use kyā kahūñ use kyā karūñ ki maiñ un ke dil se utar gayā

use dil-lagī kā mazā milā use āshiqī kā mazā milā

use zindagī kā mazā milā jo tirī adāoñ pe mar gayā

koī dost hai ki ġhulām hai koī ye bhī tarz-e-kalām hai

vo kahāñ gayā vo kahāñ gayā vo kidhar gayā vo kidhar gayā

tire zulm aur sitam sahe tire jāñ-nisār bhī ham rahe

na raqīb jis ko har ik kahe ki tirī jafāoñ se Dar gayā

rahe kyuuñ na siine meñ dam ḳhafā ye nayā sitam hai na.ī jafā

kahūñ kyā safī' koī bevafā mire dil ko le kar mukar gayā

shab-e-hijr aah kidhar gai kahun kis se nala kidhar gaya

jo guzar gai wo guzar gai jo guzar gaya wo guzar gaya

jo tumhaari aankh se gir paDa jo tumhaare dil se utar gaya

wo gharib jite-ji mar gaya wo kahan gaya wo kidhar gaya

koi apne bachne ka Dhab nahin koi zindagi ka sabab nahin

mere pas dil bhi to ab nahin wo idhar gae ye udhar gaya

koi dard ho to dawa karun na bane dawa to dua karun

use kya kahun use kya karun ki main un ke dil se utar gaya

use dil-lagi ka maza mila use aashiqi ka maza mila

use zindagi ka maza mila jo teri adaon pe mar gaya

koi dost hai ki ghulam hai koi ye bhi tarz-e-kalam hai

wo kahan gaya wo kahan gaya wo kidhar gaya wo kidhar gaya

tere zulm aur sitam sahe tere jaan-nisar bhi hum rahe

na raqib jis ko har ek kahe ki teri jafaon se Dar gaya

rahe kyun na sine mein dam KHafa ye naya sitam hai nai jafa

kahun kya safi' koi bewafa mere dil ko le kar mukar gaya