shab-e-hijran ki wahshat ko tu ai bedad kya jaane

shab-e-hijrāñ kī vahshat ko tū ai bedād kyā jaane

jo din paḌte haiñ rātoñ ko mujhe terī balā jaane

judā ham se huā thā ek din jo apne yāroñ meñ

ḳhabar phir kuchh na paa.ī kyā huā vaaq.e ḳhudā jaane

na rakh ai abr tū sar par hamāre baar minnat kā

vo bādal aur haiñ jo aag ko dil kī bujhā jaane

na rakh ai dil tū ummīd-e-vafā in be-vafāoñ se

ḳhudā se hai vo begāna jo but ko āshnā jaane

junūñ ne us ke gul se bulbuloñ tak shor Daalā hai

'yaqīñ' sā ho koī tab is tarah dhūmeñ machā jaane

shab-e-hijran ki wahshat ko tu ai bedad kya jaane

jo din paDte hain raaton ko mujhe teri bala jaane

juda hum se hua tha ek din jo apne yaron mein

KHabar phir kuchh na pai kya hua waqe KHuda jaane

na rakh ai abr tu sar par hamare bar minnat ka

wo baadal aur hain jo aag ko dil ki bujha jaane

na rakh ai dil tu ummid-e-wafa in be-wafaon se

KHuda se hai wo begana jo but ko aashna jaane

junun ne us ke gul se bulbulon tak shor Dala hai

'yaqin' sa ho koi tab is tarah dhumen macha jaane