شب ہجراں کو بھگانے کی دعا کونسی ہے

شب ہجراں کو بھگانے کی دعا کونسی ہے

نہیں ٹلتی کسی صورت یہ بلا کونسی ہے

زہر دینے میں جھجک کیوں ہے تجھے چارہ گر

دوسری اور مرے دکھ کی دوا کونسی ہے

دل ہی دل میں جو ہنسا کرتے ہو چپکے چپکے

بات میں بھی تو سنوں ایسی بھلا کونسی ہے

میری آنکھوں میں ہے ساقی کی جوانی کا نشہ

مجھ سے پوچھو کہ مئے ہوش ربا کونسی ہے

میں سزاوار محبت ہوں مٹا دے مجھ کو

کچھ خطا تیری بھی نکلے تو سزا کونسی ہے

آج کل مجھ سے خفا رہتے ہیں غیروں سے خوش

میرے بارے میں خدا جانے ہوا کونسی ہے

خضرؔ نے راہ بتا دی مجھے بت خانے کی

پوچھا تھا منزل عرفان خدا کونسی ہے