shab-e-hijran ko bhagane ki dua kaunsi hai

shab-e-hijrāñ ko bhagāne kī duā kaunsī hai

nahīñ Taltī kisī sūrat ye balā kaunsī hai

zahr dene meñ jhijak kyoñ hai tujhe chārāgar

dūsrī aur mire dukh kī davā kaunsī hai

dil hī dil meñ jo hañsā karte ho chupke chupke

baat maiñ bhī to sunūñ aisī bhalā kaunsī hai

merī āñkhoñ meñ hai saaqī kī javānī kā nasha

mujh se pūchho ki mai-e-hosh-rubā kaunsī hai

maiñ sazā-vār-e-mohabbat huuñ miTā de mujh ko

kuchh ḳhatā terī bhī nikle to sazā kaunsī hai

āj-kal mujh se ḳhafā rahte haiñ ġhairoñ se ḳhush

mere baare meñ ḳhudā jaane havā kaunsī hai

'ḳhizr' ne raah batā dī mujhe but-ḳhāne kī

pūchhā thā manzil-e-irfān-e-ḳhudā kaunsī hai

shab-e-hijran ko bhagane ki dua kaunsi hai

nahin Talti kisi surat ye bala kaunsi hai

zahr dene mein jhijak kyon hai tujhe chaaragar

dusri aur mere dukh ki dawa kaunsi hai

dil hi dil mein jo hansa karte ho chupke chupke

baat main bhi to sunun aisi bhala kaunsi hai

meri aankhon mein hai saqi ki jawani ka nasha

mujh se puchho ki mai-e-hosh-ruba kaunsi hai

main saza-war-e-mohabbat hun miTa de mujh ko

kuchh KHata teri bhi nikle to saza kaunsi hai

aaj-kal mujh se KHafa rahte hain ghairon se KHush

mere bare mein KHuda jaane hawa kaunsi hai

'KHizr' ne rah bata di mujhe but-KHane ki

puchha tha manzil-e-irfan-e-KHuda kaunsi hai