shab-e-mahshar teri bahon ke talabgar rahe

shab-e-mahshar tirī bāhoñ ke talabgār rahe

ham tire apnoñ meñ ho kar bhī to aġhyār rahe

ek maiñ huuñ jo hamesha se muḳhālif Thahrā

ek tum ho jo hamesha se taraf-dār rahe

saath ho kar bhī to ham saath nahīñ haiñ maano

ek āñgan ho magar biich meñ dīvār rahe

ek us se hī nahīñ nibh sakā rishta ham se

yuuñ to ham saare zamāne se vafādār rahe

fā.eda kyā huā jo us ne muāfī de dī

apnī nazroñ meñ to tā-umr gunahgār rahe

ek arse se hañsī tak nahīñ aa.ī ham ko

ek arse se udāsī meñ giraftār rahe

film ke ant meñ jo jaan gañvā detā hai

ham haqīqat meñ vahī āḳhirī kirdār rahe

shab-e-mahshar teri bahon ke talabgar rahe

hum tere apnon mein ho kar bhi to aghyar rahe

ek main hun jo hamesha se muKHalif Thahra

ek tum ho jo hamesha se taraf-dar rahe

sath ho kar bhi to hum sath nahin hain mano

ek aangan ho magar bich mein diwar rahe

ek us se hi nahin nibh saka rishta hum se

yun to hum sare zamane se wafadar rahe

faeda kya hua jo us ne muafi de di

apni nazron mein to ta-umr gunahgar rahe

ek arse se hansi tak nahin aai hum ko

ek arse se udasi mein giraftar rahe

film ke ant mein jo jaan ganwa deta hai

hum haqiqat mein wahi aaKHiri kirdar rahe