shab-e-siyah hai naddi ke pas baiThe hain

shab-e-siyāh hai naddī ke paas baiThe haiñ

kisī kī yaad meñ tanhā udaas baiThe haiñ

guzar rahe haiñ manāzir nazar ke aage se

sabhī se chhupte hue bad-havās baiThe haiñ

jage sitāroñ kī mahfil ujaḌne vaalī hai

idhar pahan ke añdhere libās baiThe haiñ

hamāre ba.ad use kaun hai jo suntā ho

fareb khā ke bhī ham us ke paas baiThe haiñ

yahī maqām thā āḳhir meñ ishq vāloñ kā

ġhamoñ se duur kahīñ ġham-shanās baiThe haiñ

shab-e-siyah hai naddi ke pas baiThe hain

kisi ki yaad mein tanha udas baiThe hain

guzar rahe hain manazir nazar ke aage se

sabhi se chhupte hue bad-hawas baiThe hain

jage sitaron ki mahfil ujaDne wali hai

idhar pahan ke andhere libas baiThe hain

hamare baad use kaun hai jo sunta ho

fareb kha ke bhi hum us ke pas baiThe hain

yahi maqam tha aaKHir mein ishq walon ka

ghamon se dur kahin gham-shanas baiThe hain