شب تار سے نہ گھبرا مری نو بہار انجم

شب تار سے نہ گھبرا مری نو بہار انجم

کہ سحر کو دیکھنا ہے ہمیں نور کا تلاطم

ابھی زندگی کی جنت غم زندگی میں ہے گم

کہیں عارضوں پہ شبنم کہیں نیل گوں تبسم

تری یاد جام و مینا تری یاد ماہ و انجم

کہ ہر ایک تلخئ غم تری یاد میں ہوئی گم

وہاں گردشیں رکی ہیں وہاں زندگی ملی ہے

جہاں جم گئیں نگاہیں جہاں مسکرائے ہم تم

وہی روشنی سے ضد ہے ابھی ظلمتوں کے دل کو

ابھی اور سخت ہوگا شب و روز کا تصادم

وہ نگاہ و دل کی جنت وہ دماغ کی طہارت

وہ تمام رنگ و نکہت وہ تمام تر ترنم

یہ فضائے غم گھلے گی کبھی عشق کی چمک سے

ابھی سوگوار ہوں میں ابھی سوگوار ہو تم

ابھی احتیاط ہی سے مرے دل کے پاس آنا

مری جان نو بہاراں مری مایۂ تبسم

کسی یاد دل ربا کا یہ کرم رہا ہے سیفیؔ

کہ سلا گئی ہے دل کو کبھی آب و تاب انجم