shab-e-tar se na ghabra meri nau-bahaar anjum

shab-e-tār se na ghabrā mirī nau-bahār anjum

ki sahar ko dekhnā hai hameñ nuur kā talātum

abhī zindagī kī jannat ġham-e-zindagī meñ hai gum

kahīñ ārizoñ pe shabnam kahīñ nīlgūñ tabassum

tirī yaad jām-o-mīnā tirī yaad māh-o-anjum

ki har ek talḳhī-e-ġham tirī yaad meñ huī gum

vahāñ gardisheñ rukī haiñ vahāñ zindagī milī hai

jahāñ jam ga.iiñ nigāheñ jahāñ muskurā.e ham tum

vahī raushnī se zid hai abhī zulmatoñ ke dil ko

abhī aur saḳht hogā shab-o-roz kā tasādum

vo nigāh-o-dil kī jannat vo dimāġh kī tahārat

vo tamām rang-o-nik.hat vo tamām-tar tarannum

ye fazā-e-ġham ghulegī kabhī ishq kī chamak se

abhī sogvār huuñ maiñ abhī sogvār ho tum

abhī ehtiyāt hī se mire dil ke paas aanā

mirī jān-e-nau-bahārāñ mirī māya-e-tabassum

kisī yād-e-dil-rubā kā ye karam rahā hai 'saifī'

ki sulā ga.ī hai dil ko kabhī āb-o-tāb-e-anjum

shab-e-tar se na ghabra meri nau-bahaar anjum

ki sahar ko dekhna hai hamein nur ka talatum

abhi zindagi ki jannat gham-e-zindagi mein hai gum

kahin aarizon pe shabnam kahin nilgun tabassum

teri yaad jam-o-mina teri yaad mah-o-anjum

ki har ek talKHi-e-gham teri yaad mein hui gum

wahan gardishen ruki hain wahan zindagi mili hai

jahan jam gain nigahen jahan muskurae hum tum

wahi raushni se zid hai abhi zulmaton ke dil ko

abhi aur saKHt hoga shab-o-roz ka tasadum

wo nigah-o-dil ki jannat wo dimagh ki tahaarat

wo tamam rang-o-nikhat wo tamam-tar tarannum

ye faza-e-gham ghulegi kabhi ishq ki chamak se

abhi sogwar hun main abhi sogwar ho tum

abhi ehtiyat hi se mere dil ke pas aana

meri jaan-e-nau-bahaaran meri maya-e-tabassum

kisi yaad-e-dil-ruba ka ye karam raha hai 'saifi'

ki sula gai hai dil ko kabhi aab-o-tab-e-anjum