shab-e-wada hai tu hai aur main hun

shab-e-va.ada hai tū hai aur maiñ huuñ

hujūm-e-ārzū hai aur maiñ huuñ

dil-e-begāna-ḳhū hai aur maiñ huuñ

baġhal meñ ik adū hai aur maiñ huuñ

miTātā hī rahā jis ko muqaddar

vo merī aarzū hai aur maiñ huuñ

pareshāñ-ḳhātirī kahtī hai apnī

kisī kī justujū hai aur maiñ huuñ

shab-e-tanhā.ī-e-furqat meñ dil se

kuchh us kī guftugū hai aur maiñ huuñ

gulistān-e-jahāñ hai qābil-e-sair

tilism-e-rañg-o-bū hai aur maiñ huuñ

nigāh-e-lutf-e-dilbar kā hai iz.hār

phaTe dil kā rafū hai aur maiñ huuñ

kahīñ chhoḌā agar qātil kā dāman

tū phir merā lahū hai aur maiñ huuñ

'jalāl' us ko banāyā us ne dushman

qayāmat meñ adū hai aur maiñ huuñ

shab-e-wada hai tu hai aur main hun

hujum-e-arzu hai aur main hun

dil-e-begana-KHu hai aur main hun

baghal mein ek adu hai aur main hun

miTata hi raha jis ko muqaddar

wo meri aarzu hai aur main hun

pareshan-KHatiri kahti hai apni

kisi ki justuju hai aur main hun

shab-e-tanhai-e-furqat mein dil se

kuchh us ki guftugu hai aur main hun

gulistan-e-jahan hai qabil-e-sair

tilism-e-rang-o-bu hai aur main hun

nigah-e-lutf-e-dilbar ka hai izhaar

phaTe dil ka rafu hai aur main hun

kahin chhoDa agar qatil ka daman

tu phir mera lahu hai aur main hun

'jalal' us ko banaya us ne dushman

qayamat mein adu hai aur main hun