شب وصل اور لب پہ نفرت کی باتیں

شب وصل اور لب پہ نفرت کی باتیں

محبت سے کیجے محبت کی باتیں

لہو سینۂ سنگ سے پھوٹ نکلے

سناؤں جو اے دوست غربت کی باتیں

مرا دل محبت سے اب بھر چکا ہے

نہ کیجے مہرباں محبت کی باتیں

نہ ہمدم ہے کوئی کسی کا نہ مونس

دکھاوے کی ہوتی ہیں چاہت کی باتیں

نہ دشنام دیجے یہ اچھا نہیں ہے

شریفوں سے کیجے شرافت کی باتیں

کدورت ہر اک دل میں گھر کر چکی ہے

ہر اک کر رہا ہے ضرورت کی باتیں

ابھی تک مجھے یاد ہیں اے گرامیؔ

وہ مخمور راتیں وہ خلوت کی باتیں