shab-e-wasl ruTha hai dilbar kisi ka

shab-e-vasl rūThā hai dilbar kisī kā

na yuuñ ban ke bigḌe muqaddar kisī kā

ġhash aaya jo mujh ko to zālim ye bolā

na rakkheñge zaanū pe ham sar kisī kā

masahrī pe phūloñ kī sotā hai koī

taḌaptā hai kāñToñ pe muztar kisī kā

ga.e vo to taqdīr phūTī kisī kī

vo aa.e to chamkā muqaddar kisī kā

dam-e-qatl bhī muñh phirā.e hue hai

baḌā be-muravvat hai ḳhanjar kisī kā

vo dekhā kiye le ke sīmāb pahroñ

jo yaad aa gayā qalb-e-muztar kisī kā

sabā jā ke chupke se kahnā kisī se

dil aaya hai ai shoḳh tujh par kisī kā

pas-e-marg aaya jo turbat pe qāsid

to royā bahut naam le kar kisī kā

shab-e-vasl merā kuchh isrār karnā

baḌhānā vo sharmā ke zevar kisī kā

na pāmāl kar is ko ġhuncha samajh kar

ye dil hai are o sitamgar kisī kā

taḌaptā hai 'naushād' furqat meñ har-dam

judā ho kisī se na dilbar kisī kā

shab-e-wasl ruTha hai dilbar kisi ka

na yun ban ke bigDe muqaddar kisi ka

ghash aaya jo mujh ko to zalim ye bola

na rakkhenge zanu pe hum sar kisi ka

masahri pe phulon ki sota hai koi

taDapta hai kanTon pe muztar kisi ka

gae wo to taqdir phuTi kisi ki

wo aae to chamka muqaddar kisi ka

dam-e-qatl bhi munh phirae hue hai

baDa be-murawwat hai KHanjar kisi ka

wo dekha kiye le ke simab pahron

jo yaad aa gaya qalb-e-muztar kisi ka

saba ja ke chupke se kahna kisi se

dil aaya hai ai shoKH tujh par kisi ka

pas-e-marg aaya jo turbat pe qasid

to roya bahut nam le kar kisi ka

shab-e-wasl mera kuchh israr karna

baDhana wo sharma ke zewar kisi ka

na pamal kar is ko ghuncha samajh kar

ye dil hai are o sitamgar kisi ka

taDapta hai 'naushad' furqat mein har-dam

juda ho kisi se na dilbar kisi ka