shab-e-wasl zid mein basar ho gai

shab-e-vasl zid meñ basar ho ga.ī

nahīñ hote hote sahar ho ga.ī

nigah ġhair par be-asar ho ga.ī

tumhārī nazar ko nazar ho ga.ī

kasak dil meñ phir chāra-gar ho ga.ī

jo taskīñ pahar dopahar ho ga.ī

lagāte haiñ dil us se ab haar jiit

idhar ho ga.ī yā udhar ho ga.ī

javāb un kī jānib se dene lagā

ye jur.at tujhe nāma-bar ho ga.ī

bure haal se yā bhale haal se

tumheñ kyā hamārī basar ho ga.ī

mayassar hameñ ḳhvāb-e-rāhat kahāñ

zarā aañkh jhapkī sahar ho ga.ī

jafā par vafā to karūñ soch lo

tumheñ mujh se ulfat agar ho ga.ī

nigāh-e-sitam meñ kuchh ījād ho

ki ye to purānī nazar ho ga.ī

tasallī mujhe de ke jaate to ho

mabādā jo jū-e-digar ho ga.ī

kahīñ husn se bhī hai kāhīdgī

na hone ke qābil kamar ho ga.ī

shab-e-vasl aisī khilī chāñdnī

vo ghabrā ke bole sahar ho ga.ī

kahī zindagī bhar kī shab vārdāt

mirī ruuh paiġhām-bar ho ga.ī

kaho kyā karoge mire vasl kī

jo mash.hūr jhūTī ḳhabar ho ga.ī

ġham-e-hijr se 'dāġh' mujh ko najāt

yaqīñ thā na hogī magar ho ga.ī

shab-e-wasl zid mein basar ho gai

nahin hote hote sahar ho gai

nigah ghair par be-asar ho gai

tumhaari nazar ko nazar ho gai

kasak dil mein phir chaara-gar ho gai

jo taskin pahar dopahar ho gai

lagate hain dil us se ab haar jit

idhar ho gai ya udhar ho gai

jawab un ki jaanib se dene laga

ye jurat tujhe nama-bar ho gai

bure haal se ya bhale haal se

tumhein kya hamari basar ho gai

mayassar hamein KHwab-e-rahat kahan

zara aankh jhapki sahar ho gai

jafa par wafa to karun soch lo

tumhein mujh se ulfat agar ho gai

nigah-e-sitam mein kuchh ijad ho

ki ye to purani nazar ho gai

tasalli mujhe de ke jate to ho

mabaada jo ju-e-digar ho gai

kahin husn se bhi hai kahidgi

na hone ke qabil kamar ho gai

shab-e-wasl aisi khili chandni

wo ghabra ke bole sahar ho gai

kahi zindagi bhar ki shab wardat

meri ruh paigham-bar ho gai

kaho kya karoge mere wasl ki

jo mashhur jhuTi KHabar ho gai

gham-e-hijr se 'dagh' mujh ko najat

yaqin tha na hogi magar ho gai