شب وصال شب انتظار آئی ہے

شب وصال شب انتظار آئی ہے

خزاں میں دیکھیے کیسی بہار آئی ہے

ہزار غنچۂ گل پر بہار آئی ہے

صبا چمن سے مگر بے قرار آئی ہے

کسی کی یاد جو رخصت ہوئی مرے دل سے

سحر اداس تو شب سوگوار آئی ہے

ہماری روح فنا کی مسرتوں کے لئے

قبائے تن سر عالم اتار آئی ہے

یہ مے کشی تھی کہ پردہ دری کہ محفل میں

کسی کی یاد بوقت خمار آئی ہے

کہیں ضرور ہوا ہے چمن میں قتل طیور

لہو کی بوند بہ دوش غبار آئی ہے

ہزار خام تھی پھر بھی مری امید کملؔ

شباب شام تمنا نکھار آئی ہے