shab-e-visal thi raushan faza mein baiTha tha

shab-e-visāl thī raushan fazā meñ baiThā thā

maiñ tere sāya-e-lutf-o-atā meñ baiThā thā

tamām umr use DhūñDne meñ sarf huī

jo chhup ke mere badan kī guphā meñ baiThā thā

na.ī rutoñ kī havā le uḌī libās us kā

vo kal talak to harīm-e-hayā meñ baiThā thā

darūn-e-qāfila āsār the baġhāvat ke

ajab sā ḳhauf dil-e-rahnumā meñ baiThā thā

zarā sī baat ne auqāt khol dī us kī

vo kab se band hisār-e-anā meñ baiThā thā

nazar uThā ke tum ai kaash dekh hī lete

maiñ nazr-e-jāñ liye rāh-e-vafā meñ baiThā thā

lahū se us ke milī diin ko baqā-e-davām

vo qāfila jo kabhī karbalā meñ baiThā thā

usī ne luuTī thī ablā kī aabrū kal raat

savere ban ke jo mukhiyā sabhā meñ baiThā thā

bas ik shikast ne saare nashe utaar diye

vo tājdār alag sī havā meñ baiThā thā

chalā.īñ goliyāñ jis par munāfiqoñ ne 'shabāb'

saf-e-namāz meñ yād-e-ḳhudā meñ baiThā thā

shab-e-visal thi raushan faza mein baiTha tha

main tere saya-e-lutf-o-ata mein baiTha tha

tamam umr use DhunDne mein sarf hui

jo chhup ke mere badan ki gupha mein baiTha tha

nai ruton ki hawa le uDi libas us ka

wo kal talak to harim-e-haya mein baiTha tha

darun-e-qafila aasar the baghawat ke

ajab sa KHauf dil-e-rahnuma mein baiTha tha

zara si baat ne auqat khol di us ki

wo kab se band hisar-e-ana mein baiTha tha

nazar uTha ke tum ai kash dekh hi lete

main nazr-e-jaan liye rah-e-wafa mein baiTha tha

lahu se us ke mili din ko baqa-e-dawam

wo qafila jo kabhi karbala mein baiTha tha

usi ne luTi thi abla ki aabru kal raat

sawere ban ke jo mukhiya sabha mein baiTha tha

bas ek shikast ne sare nashe utar diye

wo tajdar alag si hawa mein baiTha tha

chalain goliyan jis par munafiqon ne 'shabab'

saf-e-namaz mein yaad-e-KHuda mein baiTha tha