shab-e-zindagani sahar ho gai

shab-e-zindagānī sahar ho ga.ī

bahr-kaif achchhī basar ho ga.ī

na samjhe ki shab kyuuñ sahar ho ga.ī

idhar kī zamīñ sab udhar ho ga.ī

zamāne kī bigḌī kuchh aisī havā

ki be-ġhairatī bhī hunar ho ga.ī

amā.id ne kī vaz.a jo iḳhtiyār

vahī sab ko madd-e-nazar ho ga.ī

ga.e jo nikal dām-e-tazvīr se

hazīmat hī in kī zafar ho ga.ī

zamīñ munqalib āsmāñ charḳh-zan

iqāmat bhī ham ko safar ho ga.ī

miTā Dāliye lauh-e-dil se ġhubār

kisī se ḳhatā bhī agar ho ga.ī

ba-rāh-e-karam us ko tai kījiye

jo an-ban kisī baat par ho ga.ī

na karnā thā bizzid madavā-e-ġham

baḌī chuuk ai chāra-gar ho ga.ī

ye hañgāma-ārā haiñ sab be-ḳhabar

vo chup haiñ jinheñ kuchh ḳhabar ho ga.ī

shab-e-zindagani sahar ho gai

bahr-kaif achchhi basar ho gai

na samjhe ki shab kyun sahar ho gai

idhar ki zamin sab udhar ho gai

zamane ki bigDi kuchh aisi hawa

ki be-ghairati bhi hunar ho gai

amaid ne ki waza jo iKHtiyar

wahi sab ko madd-e-nazar ho gai

gae jo nikal dam-e-tazwir se

hazimat hi in ki zafar ho gai

zamin munqalib aasman charKH-zan

iqamat bhi hum ko safar ho gai

miTa Daliye lauh-e-dil se ghubar

kisi se KHata bhi agar ho gai

ba-rah-e-karam us ko tai kijiye

jo an-ban kisi baat par ho gai

na karna tha bizzid madawa-e-gham

baDi chuk ai chaara-gar ho gai

ye hangama-ara hain sab be-KHabar

wo chup hain jinhen kuchh KHabar ho gai