shab-e-zindagi jo guzarti rahi

shab-e-zindagī jo guzartī rahī

na.e ḳhvāb āñkhoñ meñ bhartī rahī

taqaddus ke pahre fazā par rahe

gunāhoñ kī ḳhushbū bikhartī rahī

koī us meñ mausam kā mahram na thā

havādis se kashtī guzartī rahī

maiñ pyāsī nigāheñ bachātā phirā

mirī tishnagī kaam kartī rahī

falak se zamīñ par hamesha 'hayāt'

navā-e-muqaddas utartī rahī

shab-e-zindagi jo guzarti rahi

nae KHwab aankhon mein bharti rahi

taqaddus ke pahre faza par rahe

gunahon ki KHushbu bikharti rahi

koi us mein mausam ka mahram na tha

hawadis se kashti guzarti rahi

main pyasi nigahen bachata phira

meri tishnagi kaam karti rahi

falak se zamin par hamesha 'hayat'

nawa-e-muqaddas utarti rahi