shab jo ruKH-e-pur-Khaal se wo burqe ko utare sote hain

shab jo ruḳh-e-pur-ḳhāl se vo burqe ko utāre sote haiñ

chashm-e-qamar lagtī hī nahīñ kyā balki na taare sote haiñ

band kiye āñkheñ vo apnī nashshe ke maare sote haiñ

vaqt yahī hai ghaat kā ai dil dekh chikāre sote haiñ

hijr meñ tere shams o qamar kī aañkh lage kyā lail-o-nahār

charḳh ke kab gahvāre meñ ye ishq ke maare sote haiñ

aayā thā vo māh-jabīñ iqrār pe aadhī raat ko aah

yaaro kyūñkar jāgte rahiye baḳht hamāre sote haiñ

fursat pā kar haath lagāyā paañv ko un ke jab maiñ ne

kahne lage chal duur sarak mat haath lagā re sote haiñ

bistar-e-gul kī bālish-e-par kī un ko nahīñ kuchh hājat hai

sar ko tire zaanū par rakh jo shab ko pyāre sote haiñ

kyā jaane is ḳhvāb-e-adam meñ lazzat hai jo ahl-e-qubūr

apne apne ghar meñ haañ yuuñ paañv pasāre sote haiñ

ik muddat meñ phirte phirte muñh se sunī darbāñ ke ye baat

shukr ḳhudā kā apne vo ghar meñ aaj to pyāre sote haiñ

chorī se ham shab ko pahuñche paañv talak juuñ duzd-e-hinā

lekin chaukīdār ka.ī nazdīk tumhāre sote haiñ

us ke qarīb-e-chashm kahāñ hai ḳhaal dilā Tuk ġhaur se dekh

kaifiyyat se mast paḌe dariyā ke kināre sote haiñ

vo to kabhī bedārī meñ juz-ḳhvāb nahīñ milte yaaro

koī hameñ hargiz na uThānā hijr ke maare sote haiñ

maañg meñ terī kyuuñ na kareñ ushshāq ke dil ārām bhalā

haiñ ye musāfir raste meñ manzil ke maare sote haiñ

chashm-e-mulāqāt un se rakhiye tū hī batā kis vaj.h 'nasīr'

ġhair kī jānib abrū se vo kar ke ishāre sote haiñ

shab jo ruKH-e-pur-KHal se wo burqe ko utare sote hain

chashm-e-qamar lagti hi nahin kya balki na tare sote hain

band kiye aankhen wo apni nashshe ke mare sote hain

waqt yahi hai ghat ka ai dil dekh chikare sote hain

hijr mein tere shams o qamar ki aankh lage kya lail-o-nahaar

charKH ke kab gahware mein ye ishq ke mare sote hain

aaya tha wo mah-jabin iqrar pe aadhi raat ko aah

yaro kyunkar jagte rahiye baKHt hamare sote hain

fursat pa kar hath lagaya panw ko un ke jab main ne

kahne lage chal dur sarak mat hath laga re sote hain

bistar-e-gul ki baalish-e-par ki un ko nahin kuchh hajat hai

sar ko tere zanu par rakh jo shab ko pyare sote hain

kya jaane is KHwab-e-adam mein lazzat hai jo ahl-e-qubur

apne apne ghar mein han yun panw pasare sote hain

ek muddat mein phirte phirte munh se suni darban ke ye baat

shukr KHuda ka apne wo ghar mein aaj to pyare sote hain

chori se hum shab ko pahunche panw talak jun duzd-e-hina

lekin chaukidar kai nazdik tumhaare sote hain

us ke qarib-e-chashm kahan hai KHal dila Tuk ghaur se dekh

kaifiyyat se mast paDe dariya ke kinare sote hain

wo to kabhi bedari mein juz-KHwab nahin milte yaro

koi hamein hargiz na uThana hijr ke mare sote hain

mang mein teri kyun na karen ushshaq ke dil aaram bhala

hain ye musafir raste mein manzil ke mare sote hain

chashm-e-mulaqat un se rakhiye tu hi bata kis wajh 'nasir'

ghair ki jaanib abru se wo kar ke ishaare sote hain