شب کاٹنے کی اور ہی صورت نکالیے

شب کاٹنے کی اور ہی صورت نکالیے

آنا تھا جن کو آج وہ اے دوست آ لیے

راہ سفر طویل ہے گر بن پڑے تو بس

خوابوں سے عشق کیجئے زخموں کو پالیے

پل بھر کے واسطے سہی ہنگامہ کچھ تو ہو

نس نس کو اپنی کاٹیے لوہو اچھالیے

اب لفظ لفظ رنگ اڑانے سے فائدہ

ہونا تھا جو وہ ہو چکا اب خاک ڈالیے

نیچر کا کوئی بھی نہ نشاں شہر میں رہے

پیڑوں کے پاؤں کاٹیے سڑکیں نکالیے

اس عہد کے مزاج کو بھی جانئے ذرا

موتی بکھیر دیجئے پتھر سنبھالیے