shab ke parde mein ek aawaz laga jata hai

shab ke parde meñ ik āvāz lagā jaatā hai

sham.a sī koī añdhere meñ jalā jaatā hai

lafz-o-ma.anī se judā saut-o-sadā se mahrūm

ġham kī tahzīb meñ kuchh yuuñ bhī kahā jaatā hai

mere lahje meñ tashakkur ke sivā kuchh bhī nahīñ

tere chehre kā ye kyoñ rang uḌā jaatā hai

shukriya nik.hat-e-gul bū-e-chaman mauj-e-nasīm

koī jhoñkā mire āñgan meñ bhī aa jaatā hai

har ġhazal kah ke ye mahsūs huā hai 'sāġhar'

dil meñ jo thā vahī kahne se rahā jaatā hai

shab ke parde mein ek aawaz laga jata hai

shama si koi andhere mein jala jata hai

lafz-o-mani se juda saut-o-sada se mahrum

gham ki tahzib mein kuchh yun bhi kaha jata hai

mere lahje mein tashakkur ke siwa kuchh bhi nahin

tere chehre ka ye kyon rang uDa jata hai

shukriya nikhat-e-gul bu-e-chaman mauj-e-nasim

koi jhonka mere aangan mein bhi aa jata hai

har ghazal kah ke ye mahsus hua hai 'saghar'

dil mein jo tha wahi kahne se raha jata hai