shab KHwab ke jaziron mein hans kar guzar gai

shab ḳhvāb ke jazīroñ meñ hañs kar guzar ga.ī

āñkhoñ meñ vaqt-e-sub.h magar dhuul bhar ga.ī

pichhlī rutoñ meñ saare shajar bārvar to the

ab ke har ek shāḳh magar be-samar ga.ī

ham bhī baḌhe the vādi-e-iz.hār meñ magar

lahje ke intishār se āvāz mar ga.ī

tujh phuul ke hisār meñ ik lutf hai ajab

chhū kar jise havā-e-tarab-e-motabar ga.ī

dil meñ ajab sā tiir tarāzū hai in dinoñ

haañ ai nigāh-e-nāz batā tū kidhar ga.ī

maqsad salā-e-ām hai phir ehtiyāt kyuuñ

be-rañg rauzanoñ se jo ḳhushbū guzar ga.ī

us ke dayār meñ ka.ī mahtāb bhej kar

vādi-e-dil meñ ik amāvas Thahar ga.ī

ab ke qafas se duur rahī mausamī havā

āzād tā.eroñ ke paroñ ko katar ga.ī

āñdhī ne sirf mujh ko musaḳhḳhar nahīñ kiyā

ik dasht-e-be-dilī bhī mire naam kar ga.ī

phir chār-sū kasīf dhueñ phailne lage

phir shahr kī nigāh tere qasr par ga.ī

alfāz ke tilism se 'amabar' ko hai shaġhaf

us kī hayāt kaise bhalā be-hunar ga.ī

shab KHwab ke jaziron mein hans kar guzar gai

aankhon mein waqt-e-subh magar dhul bhar gai

pichhli ruton mein sare shajar barwar to the

ab ke har ek shaKH magar be-samar gai

hum bhi baDhe the wadi-e-izhaar mein magar

lahje ke intishaar se aawaz mar gai

tujh phul ke hisar mein ek lutf hai ajab

chhu kar jise hawa-e-tarab-e-motabar gai

dil mein ajab sa tir taraazu hai in dinon

han ai nigah-e-naz bata tu kidhar gai

maqsad sala-e-am hai phir ehtiyat kyun

be-rang rauzanon se jo KHushbu guzar gai

us ke dayar mein kai mahtab bhej kar

wadi-e-dil mein ek amawas Thahar gai

ab ke qafas se dur rahi mausami hawa

aazad taeron ke paron ko katar gai

aandhi ne sirf mujh ko musaKHKHar nahin kiya

ek dasht-e-be-dili bhi mere nam kar gai

phir chaar-su kasif dhuen phailne lage

phir shahr ki nigah tere qasr par gai

alfaz ke tilism se 'amabar' ko hai shaghaf

us ki hayat kaise bhala be-hunar gai