shab ki mutrib tha sharab-e-nab thi paimana tha

shab ki mutrib thā sharāb-e-nāb thī paimāna thā

vo parī-vash kyā na thā goyā ki jo kuchh thā na thā

soz-e-dil se lab ye har dam naala betābāna thā

hijr-e-sāqī meñ kisī pahlū qarār aslā na thā

jalva-gar dil meñ ḳhayāl-e-āriz-e-jānāna thā

ghar kī zīnat thī ki zīnat-baḳhsh sāhab-ḳhāna thā

kyā karūñ ab mubtalā huuñ aap apne haal meñ

dī thī ne'mat us ne jab lab par mire shukrāna thā

shohra-e-āfāq hotī merī az-ḳhud-raftagī

ḳhairiyat guzrī ki āñkhoñ se tujhe dekhā na thā

fasl-e-gul meñ chhoḌtā mai dekh kar māh-e-siyām

kuchh junūñ mujh ko na thā vahshat na thī saudā na thā

kyā kahūñ Dar ye hai vo lailā-adā rusvā na ho

varna majnūñ se bhī kuchh baḌh kar merā afsāna na thā

gar nazākat meñ na hotā misl-e-tār-e-ankabūt

ḳhuub ulfat se zamāna meñ koī rishta na thā

yuuñ za.īfī aa ga.ī goyā azal se the za.iif

aur shabāb aisā gayā jaise kabhī aayā na thā

hai yaqīñ 'āshiq tumhārā mar gayā ho lo ḳhabar

maiñ ne kal dekhā thā jā kar haal kuchh achchhā na thā

nīm-bāz āñkheñ tumhārā naam thā vird-e-zabāñ

zaḳhm-e-dil par haath thā lab par magar shikva na thā

baḳht kī bargasht-agī guzrī hai had se ai 'habīb'

dekhte haiñ un ke talve jin kā muñh dekhā na thā

shab ki mutrib tha sharab-e-nab thi paimana tha

wo pari-wash kya na tha goya ki jo kuchh tha na tha

soz-e-dil se lab ye har dam nala betabana tha

hijr-e-saqi mein kisi pahlu qarar asla na tha

jalwa-gar dil mein KHayal-e-ariz-e-jaanana tha

ghar ki zinat thi ki zinat-baKHsh sahab-KHana tha

kya karun ab mubtala hun aap apne haal mein

di thi ne'mat us ne jab lab par mere shukrana tha

shohra-e-afaq hoti meri az-KHud-raftagi

KHairiyat guzri ki aankhon se tujhe dekha na tha

fasl-e-gul mein chhoDta mai dekh kar mah-e-siyam

kuchh junun mujh ko na tha wahshat na thi sauda na tha

kya kahun Dar ye hai wo laila-ada ruswa na ho

warna majnun se bhi kuchh baDh kar mera afsana na tha

gar nazakat mein na hota misl-e-tar-e-ankabut

KHub ulfat se zamana mein koi rishta na tha

yun zaifi aa gai goya azal se the zaif

aur shabab aisa gaya jaise kabhi aaya na tha

hai yaqin 'ashiq tumhaara mar gaya ho lo KHabar

main ne kal dekha tha ja kar haal kuchh achchha na tha

nim-baz aankhen tumhaara nam tha wird-e-zaban

zaKHm-e-dil par hath tha lab par magar shikwa na tha

baKHt ki bargasht-agi guzri hai had se ai 'habib'

dekhte hain un ke talwe jin ka munh dekha na tha