shab ki tariki mein bhi ek dam sawera ho gaya

shab kī tārīkī meñ bhī ik dam saverā ho gayā

anjuman meñ un ke aane se ujālā ho gayā

vo thā bad-qismat nigāheñ jis ne un se pher liiñ

bazm meñ hote hue vo shaḳhs tanhā ho gayā

dushmanoñ kī zahr-afshānī se thā maiñ fikrmand

lab pe un kā naam kyā aayā maiñ dariyā ho gayā

qatl insāñ ho rahā hai nafratoñ kī bhiiḌ meñ

haa.e ḳhuun insān kā kis darja sastā ho gayā

ye bhī mobile kā ik adnā karishma hai miyāñ

vaqt se pahle hī har bachcha siyānā ho gayā

aadmī hī se ḳhatā.eñ hotī haiñ ai dosto

kis ne kab dā'vā kiyā 'rahbar' farishta ho gayā

shab ki tariki mein bhi ek dam sawera ho gaya

anjuman mein un ke aane se ujala ho gaya

wo tha bad-qismat nigahen jis ne un se pher lin

bazm mein hote hue wo shaKHs tanha ho gaya

dushmanon ki zahr-afshani se tha main fikrmand

lab pe un ka nam kya aaya main dariya ho gaya

qatl insan ho raha hai nafraton ki bhiD mein

hae KHun insan ka kis darja sasta ho gaya

ye bhi mobile ka ek adna karishma hai miyan

waqt se pahle hi har bachcha siyana ho gaya

aadmi hi se KHataen hoti hain ai dosto

kis ne kab da'wa kiya 'rahbar' farishta ho gaya