shab ko tanhai mein yaaden jo sada deti hain

shab ko tanhā.ī meñ yādeñ jo sadā detī haiñ

dil ke vīrāne meñ ik shahr basā detī haiñ

shiddat-e-zabt kī lazzat ko ghaTā detī haiñ

āñkheñ nādān haiñ kyoñ ashk bahā detī haiñ

ḳhushbū dete haiñ sabhī daaġh purāne dil ke

jab ye purvā.iyāñ yādoñ ko havā detī haiñ

Duub jaatā hai jo sannāTe meñ saarā aalam

dil kī bechainiyāñ tab dād-e-vafā detī haiñ

jazba-e-shauq kā iz.hār na hone paa.e

dil kī be-tābiyāñ nazroñ se girā detī haiñ

jādūgar haiñ ye na.ī sub.h kī ummīdeñ bhī

suunī āñkhoñ meñ na.e diip jalā detī haiñ

karb ehsās kā pūchho zarā bevāoñ se

bhūke bachchoñ ko thapak kar jo sulā detī haiñ

bad-gumānī ko jagah dil meñ na denā hargiz

ye ġhalat-fahmiyāñ jhagḌoñ ko baḌhā detī haiñ

ab vahī nazreñ jo detī thiiñ shu.ūr-e-hastī

ham ko nā-karda gunāhī kī sazā detī haiñ

jin se baaqī rahe rishtoñ ke taqaddus kā bharam

vo ta.alluq kī ḳharāsheñ bhī mazā detī haiñ

bārhā un se kiyā tark-e-ta.alluq 'bebāk'

niiñd kī vādiyāñ phir un se milā detī haiñ

shab ko tanhai mein yaaden jo sada deti hain

dil ke virane mein ek shahr basa deti hain

shiddat-e-zabt ki lazzat ko ghaTa deti hain

aankhen nadan hain kyon ashk baha deti hain

KHushbu dete hain sabhi dagh purane dil ke

jab ye purwaiyan yaadon ko hawa deti hain

Dub jata hai jo sannaTe mein sara aalam

dil ki bechainiyan tab dad-e-wafa deti hain

jazba-e-shauq ka izhaar na hone pae

dil ki be-tabiyan nazron se gira deti hain

jadugar hain ye nai subh ki ummiden bhi

suni aankhon mein nae dip jala deti hain

karb ehsas ka puchho zara bewaon se

bhuke bachchon ko thapak kar jo sula deti hain

bad-gumani ko jagah dil mein na dena hargiz

ye ghalat-fahmiyan jhagDon ko baDha deti hain

ab wahi nazren jo deti thin shuur-e-hasti

hum ko na-karda gunahi ki saza deti hain

jin se baqi rahe rishton ke taqaddus ka bharam

wo talluq ki KHarashen bhi maza deti hain

barha un se kiya tark-e-talluq 'bebak'

nind ki wadiyan phir un se mila deti hain