شب میں گریے پس دیوار کہاں ہوتے ہیں

شب میں گریے پس دیوار کہاں ہوتے ہیں

اب دل زار کو آزار کہاں ہوتے ہیں

یہ جو صحرا ہیں یہ گلزار کہاں ہوتے ہیں

ابر اٹھتے ہیں گہر بار کہاں ہوتے ہیں

کوئی جادو تری زنجیر میں ہوگا ورنہ

ہم سے آزاد گرفتار کہاں ہوتے ہیں

شہر میں صاحب شمشیر بہت ہیں لیکن

ظلم سے برسر پیکار کہاں ہوتے ہیں

ہم تو مقتل میں انہیں روز بلاتے ہیں مگر

لوگ سر دینے کو تیار کہاں ہوتے ہیں

جو نہ آئے سر بازار نمائش کے لیے

لوگ اس شے کے خریدار کہاں ہوتے ہیں

خاک ہو جاتے ہیں جب شہر تو ہوش آتا ہے

لوگ پہلے سے خبردار کہاں ہوتے ہیں