shab mein girye pas-e-diwar kahan hote hain

shab meñ girye pas-e-dīvār kahāñ hote haiñ

ab dil-e-zār ko āzār kahāñ hote haiñ

ye jo sahrā haiñ ye gulzār kahāñ hote haiñ

abr uThte haiñ guhar-bār kahāñ hote haiñ

koī jaadū tirī zanjīr meñ hogā varna

ham se āzād giraftār kahāñ hote haiñ

shahr meñ sāhab-e-shamshīr bahut haiñ lekin

zulm se barsar-e-paikār kahāñ hote haiñ

ham to maqtal meñ unheñ roz bulāte haiñ magar

log sar dene ko tayyār kahāñ hote haiñ

jo na aa.e sar-e-bāzār numā.ish ke liye

log us shai ke ḳharīdār kahāñ hote haiñ

ḳhaak ho jaate haiñ jab shahr to hosh aatā hai

log pahle se ḳhabar-dār kahāñ hote haiñ

shab mein girye pas-e-diwar kahan hote hain

ab dil-e-zar ko aazar kahan hote hain

ye jo sahra hain ye gulzar kahan hote hain

abr uThte hain guhar-bar kahan hote hain

koi jadu teri zanjir mein hoga warna

hum se aazad giraftar kahan hote hain

shahr mein sahab-e-shamshir bahut hain lekin

zulm se barsar-e-paikar kahan hote hain

hum to maqtal mein unhen roz bulate hain magar

log sar dene ko tayyar kahan hote hain

jo na aae sar-e-bazar numaish ke liye

log us shai ke KHaridar kahan hote hain

KHak ho jate hain jab shahr to hosh aata hai

log pahle se KHabar-dar kahan hote hain