shab mein jo zulf ruKH pe bikhar kar simaT gai

shab meñ jo zulf ruḳh pe bikhar kar simaT ga.ī

vo nuur ban ke din ke ujāle meñ baT ga.ī

itnī hasīn aa.ī na aa.egī umr bhar

ik tere intizār meñ jo umr kaT ga.ī

khoyā huā thā tere tasavvur meñ jis ghaḌī

tārīkī jitnī zehn pe chhā.ī thī chhaT ga.ī

hoñToñ pe raqs kartā rahā naam jab tirā

har kāmyābī baḌh ke qadam se lipaT ga.ī

samjhūñ to kaise samjhūñ maiñ raftār-e-zindagī

tezī se baḌhtī baḌhtī rahī phir simaT ga.ī

āñkhoñ meñ merī tuur kā manzar thā ai 'shafīq'

jab āshiqī naqāb ulaT kar lipaT ga.ī

shab mein jo zulf ruKH pe bikhar kar simaT gai

wo nur ban ke din ke ujale mein baT gai

itni hasin aai na aaegi umr bhar

ek tere intizar mein jo umr kaT gai

khoya hua tha tere tasawwur mein jis ghaDi

tariki jitni zehn pe chhai thi chhaT gai

honTon pe raqs karta raha nam jab tera

har kaamyabi baDh ke qadam se lipaT gai

samjhun to kaise samjhun main raftar-e-zindagi

tezi se baDhti baDhti rahi phir simaT gai

aankhon mein meri tur ka manzar tha ai 'shafiq'

jab aashiqi naqab ulaT kar lipaT gai