yaad mujhko karne wale mere pyare mar gae

yaad mujh ko karne vaale mere pyāre mar ga.e

jin ko mujh se thī mohabbat log saare mar ga.e

dukh mujhe is baat kā hai maiñ akelā rah gayā

merī bastī ke makīñ sab us kināre mar ga.e

vo judā ho kar dobāra mil sakegā yā nahīñ

karte karte umr bhar ham istiḳhāre mar ga.e

gā.ikī meñ jitne sur the khā ga.ī shorīdgī

shā.irī meñ jitne bhī the isti.āre mar ga.e

chāñd ne pahnī qabā-e-abd aadhī raat ko

merī āñkhoñ meñ ka.ī raushan sitāre mar ga.e

ḳhāmushī ke sab kinā.e zuud goī le uḌī

rah ga.e alfāz baaqī aur ishāre mar ga.e

vaqt kartā hai hamesha aur hī kuchh faisle

jo the lashkar meñ bahādur Dar ke maare mar ga.e

yaad mujh ko karne wale mere pyare mar gae

jin ko mujh se thi mohabbat log sare mar gae

dukh mujhe is baat ka hai main akela rah gaya

meri basti ke makin sab us kinare mar gae

wo juda ho kar dobara mil sakega ya nahin

karte karte umr bhar hum istiKHare mar gae

gaiki mein jitne sur the kha gai shoridgi

shairi mein jitne bhi the istiare mar gae

chand ne pahni qaba-e-abd aadhi raat ko

meri aankhon mein kai raushan sitare mar gae

KHamushi ke sab kinae zud goi le uDi

rah gae alfaz baqi aur ishaare mar gae

waqt karta hai hamesha aur hi kuchh faisle

jo the lashkar mein bahadur Dar ke mare mar gae