shab-o-roz jaise Thahar gae koi naz hai na niyaz hai

shab-o-roz jaise Thahar ga.e koī naaz hai na niyāz hai

tire hijr meñ ye patā chalā mirī umr kitnī darāz hai

ye jahāñ hai mahbas-e-be-amāñ koī saañs le to bhalā kahāñ

tirā husn aa gayā darmiyāñ yahī zindagī kā javāz hai

ho badan ke loch kā kyā bayāñ kisī nai kī mauj hai par-fishāñ

koī lai hai zer-e-qabā nihāñ koī shai ba-sūrat-e-rāz hai

tire ġham se dil phir amiir ho koī chāñd nikle safīr ho

shab-e-dasht ho hai ye zindagī na nasheb hai na farāz hai

chale taa.ir uḌ ke pas-e-shafaq hai udaas udaas ruḳh-e-ufuq

ki bayāz-e-shām kā har varaq tirī dāstān-e-darāz hai

agar ehtiyāt-e-ḳhitāb ho lab-e-sañg khil ke gulāb ho

tū kisī sanam ko sadā to de dar-e-but-kada abhī baaz hai

vahī ruup sāġhar-e-jam meñ bhī vahī aks dīda-e-nam meñ bhī

mire vāste tū haram meñ bhī vahī 'shāz' rū-e-majāz hai

shab-o-roz jaise Thahar gae koi naz hai na niyaz hai

tere hijr mein ye pata chala meri umr kitni daraaz hai

ye jahan hai mahbas-e-be-aman koi sans le to bhala kahan

tera husn aa gaya darmiyan yahi zindagi ka jawaz hai

ho badan ke loch ka kya bayan kisi nai ki mauj hai par-fishan

koi lai hai zer-e-qaba nihan koi shai ba-surat-e-raaz hai

tere gham se dil phir amir ho koi chand nikle safir ho

shab-e-dasht ho hai ye zindagi na nasheb hai na faraaz hai

chale tair uD ke pas-e-shafaq hai udas udas ruKH-e-ufuq

ki bayaz-e-sham ka har waraq teri dastan-e-daraaz hai

agar ehtiyat-e-KHitab ho lab-e-sang khil ke gulab ho

tu kisi sanam ko sada to de dar-e-but-kada abhi baz hai

wahi rup saghar-e-jam mein bhi wahi aks dida-e-nam mein bhi

mere waste tu haram mein bhi wahi 'shaz' ru-e-majaz hai