main agar surat-e-parwana fida ho jata

maiñ agar sūrat-e-parvāna fidā ho jaatā

un ko andāza-e-ā.īn-e-vafā ho jaatā

apnī qudrat se liyā kaam ilāhī tū ne

varna is daur kā har shaḳhs ḳhudā ho jaatā

ham ne taqdīr ke mafhūm ko samjhā varna

ham ko bhī shikva-e-arbāb-e-jafā ho jaatā

tum agar dekhne vaale ko nazar aa jaate

hashr se pahle hī ik hashr bapā ho jaatā

apne gulshan ko vo dozaḳh na samajhtā shāyad

yak gosha bhī jo firdaus-numā ho jaatā

tū ne pahchān liyā ishq kī qadroñ kā mizāj

ye na pūchh aaj tirī bazm meñ kyā ho jaatā

apnī ġhairat se bachā.e rahā apne ko 'azīz'

varna ahbāb ke hāthoñ hī fanā ho jaatā

main agar surat-e-parwana fida ho jata

un ko andaza-e-ain-e-wafa ho jata

apni qudrat se liya kaam ilahi tu ne

warna is daur ka har shaKHs KHuda ho jata

hum ne taqdir ke mafhum ko samjha warna

hum ko bhi shikwa-e-arbab-e-jafa ho jata

tum agar dekhne wale ko nazar aa jate

hashr se pahle hi ek hashr bapa ho jata

apne gulshan ko wo dozaKH na samajhta shayad

yak gosha bhi jo firdaus-numa ho jata

tu ne pahchan liya ishq ki qadron ka mizaj

ye na puchh aaj teri bazm mein kya ho jata

apni ghairat se bachae raha apne ko 'aziz'

warna ahbab ke hathon hi fana ho jata