shabih-e-KHanjar-e-qatil bana kar

shabīh-e-ḳhanjar-e-qātil banā kar

rakkhī siine meñ ham ne dil banā kar

junūñ dil ko na mere baiThne de

uThā de mast-e-lā-yāqil banā kar

nigāh-e-bad kā andesha hai mujh ko

vo baiThe haiñ jabīñ par til banā kar

jo qaabū tujh pe hotā merā ai jaan

tujhe pahlū meñ rakhtā dil banā kar

Darāyā pursish-e-mahshar se nāhaq

pashemāñ huuñ tujhe qātil banā kar

uThāyā hashr meñ bhī mujh ko us ne

savāl-e-dīd kā saa.il banā kar

uḌā le chal havā-e-shauq mujh ko

ġhubār-e-rahrav-e-manzil banā kar

nikālā ārzu-e-dil ko 'anjum'

tamannā-e-dil-e-bismil banā kar

shabih-e-KHanjar-e-qatil bana kar

rakkhi sine mein hum ne dil bana kar

junun dil ko na mere baiThne de

uTha de mast-e-la-yaqil bana kar

nigah-e-bad ka andesha hai mujh ko

wo baiThe hain jabin par til bana kar

jo qabu tujh pe hota mera ai jaan

tujhe pahlu mein rakhta dil bana kar

Daraya pursish-e-mahshar se nahaq

pasheman hun tujhe qatil bana kar

uThaya hashr mein bhi mujh ko us ne

sawal-e-did ka sail bana kar

uDa le chal hawa-e-shauq mujh ko

ghubar-e-rahraw-e-manzil bana kar

nikala aarzu-e-dil ko 'anjum'

tamanna-e-dil-e-bismil bana kar