شبنم کی نمی دھوپ کی تابش بھی بہت تھی

شبنم کی نمی دھوپ کی تابش بھی بہت تھی

باتوں میں گلے بھی تھے ستائش بھی بہت تھی

کچھ راس بھی آئے تھے بدلتے ہوئے موسم

کچھ پھول کی فطرت میں نمائش بھی بہت تھی

پھر بھی نہ بجھی شمع خیالوں کی تمہارے

آندھی بھی بہت تیز تھی بارش بھی بہت تھی

کچھ ساغر و مینا میں گھلا پیار کا امرت

نظروں کی کبھی اتنی نوازش بھی بہت تھی

کانٹوں میں بھی کیوں روپ نہ آ جاتا گلوں کا

اک شاخ پہ دونوں کی رہائش بھی بہت تھی

ساحل سے نہ کرتے رہیں طوفاں کا نظارہ

ہم ڈوبنے والوں کی یہ خواہش بھی بہت تھی

اس شوخ کی صورت میں کشش تو تھی بلا کی

سیرت میں مگر فطرت سازش بھی بہت تھی

تحریر جو چہروں کی کتابوں میں تھی لکھی

تم غور سے پڑھتے تو نگارش بھی بہت تھی

نکھرا ہوا کیوں رنگ تغزل کا نہ ہوتا

اس میں جو کلیمؔ آپ کی کاوش بھی بہت تھی