shabnam ki nami dhup ki tabish bhi bahut thi

shabnam kī namī dhuup kī tābish bhī bahut thī

bātoñ meñ gile bhī the satā.ish bhī bahut thī

kuchh raas bhī aa.e the badalte hue mausam

kuchh phuul kī fitrat meñ numā.ish bhī bahut thī

phir bhī na bujhī sham.a ḳhayāloñ kī tumhāre

āñdhī bhī bahut tez thī bārish bhī bahut thī

kuchh sāġhar-o-mīnā meñ ghulā pyaar kā amrit

nazroñ kī kabhī itnī navāzish bhī bahut thī

kāñToñ meñ bhī kyoñ ruup na aa jaatā guloñ kā

ik shāḳh pe donoñ kī rihā.ish bhī bahut thī

sāhil se na karte raheñ tūfāñ kā nazāra

ham Dūbne vāloñ kī ye ḳhvāhish bhī bahut thī

us shoḳh kī sūrat meñ kashish to thī balā kī

sīrat meñ magar fitrat-e-sāzish bhī bahut thī

tahrīr jo chehroñ kī kitāboñ meñ thī likkhī

tum ġhaur se paḌhte to nigārish bhī bahut thī

nikhrā huā kyoñ rang taġhazzul kā na hotā

us meñ jo 'kalīm' aap kī kāvish bhī bahut thī

shabnam ki nami dhup ki tabish bhi bahut thi

baaton mein gile bhi the sataish bhi bahut thi

kuchh ras bhi aae the badalte hue mausam

kuchh phul ki fitrat mein numaish bhi bahut thi

phir bhi na bujhi shama KHayalon ki tumhaare

aandhi bhi bahut tez thi barish bhi bahut thi

kuchh saghar-o-mina mein ghula pyar ka amrit

nazron ki kabhi itni nawazish bhi bahut thi

kanTon mein bhi kyon rup na aa jata gulon ka

ek shaKH pe donon ki rihaish bhi bahut thi

sahil se na karte rahen tufan ka nazara

hum Dubne walon ki ye KHwahish bhi bahut thi

us shoKH ki surat mein kashish to thi bala ki

sirat mein magar fitrat-e-sazish bhi bahut thi

tahrir jo chehron ki kitabon mein thi likkhi

tum ghaur se paDhte to nigarish bhi bahut thi

nikhra hua kyon rang taghazzul ka na hota

us mein jo 'kalim' aap ki kawish bhi bahut thi