shabnam-zadi jitni teri aankhon mein hariyali hai

shabnam-zādī jitnī terī āñkhoñ meñ hariyālī hai

terā sabze par na chalnā sabze kī pāmālī hai

kis ko maiñ ye baat batā.ūñ kaun ise taslīm kare

āñgan meñ palte saa.e ne merī geñd churā lī hai

ḳhvāb kī afrātafarī se niklūñ to faisla kar pā.ūñ

kis kone meñ bistar Dālūñ saarā kamra ḳhālī hai

itnī āñkheñ jhāñk rahī haiñ ab siine ke rauzan se

mausam itnā sard nahīñ thā jitnī aag jalā lī hai

jaane bistar kā darvāza kaun nagar ko khultā hai

sahrā sahrā ghuum chukā huuñ saarī ḳhaak uḌā lī hai

is girdāb meñ rahte rahte itnā hunar to siikh liyā

is se pahle eḌī ghūme ham ne soch ghumā lī hai

in hāthoñ ne badal ke rakh dī science aur rivāyat bhī

patthar paanī meñ pheñkā aur us se aag nikālī hai

shabnam-zadi jitni teri aankhon mein hariyali hai

tera sabze par na chalna sabze ki pamali hai

kis ko main ye baat bataun kaun ise taslim kare

aangan mein palte sae ne meri gend chura li hai

KHwab ki afraatafari se niklun to faisla kar paun

kis kone mein bistar Dalun sara kamra KHali hai

itni aankhen jhank rahi hain ab sine ke rauzan se

mausam itna sard nahin tha jitni aag jala li hai

jaane bistar ka darwaza kaun nagar ko khulta hai

sahra sahra ghum chuka hun sari KHak uDa li hai

is girdab mein rahte rahte itna hunar to sikh liya

is se pahle eDi ghume hum ne soch ghuma li hai

in hathon ne badal ke rakh di science aur riwayat bhi

patthar pani mein phenka aur us se aag nikali hai