shafaq kirnen kanwal talab uske

shafaq kirneñ kañval tālāb us ke

ye manzar sab hasīñ shādāb us ke

chalo kahne ko haiñ nīñdeñ hamārī

magar āñkhoñ meñ saare ḳhvāb us ke

jahān-e-tīrgī aalam hamārā

ujāle raushnī ke baab us ke

usī kī zaat vajh-e-nūr-o-naġhma

ye jharne kahkashāñ mahtāb us ke

kitāb-e-zindagī par naam apnā

jo andar dekhiye abvāb us ke

hamārī guftugū vāhī-tabāhī

magar aqvāl sab nāyāb us ke

qatīl-e-dostāñ 'jāved' apnā

mile the aaj phir ahbāb us ke

shafaq kirnen kanwal talab us ke

ye manzar sab hasin shadab us ke

chalo kahne ko hain ninden hamari

magar aankhon mein sare KHwab us ke

jahan-e-tirgi aalam hamara

ujale raushni ke bab us ke

usi ki zat wajh-e-nur-o-naghma

ye jharne kahkashan mahtab us ke

kitab-e-zindagi par nam apna

jo andar dekhiye abwab us ke

hamari guftugu wahi-tabahi

magar aqwal sab nayab us ke

qatil-e-dostan 'jawed' apna

mile the aaj phir ahbab us ke