shaffaf sath-e-ab ka manzar kahan gaya

shaffāf sat.h-e-āb kā manzar kahāñ gayā

ā.īna chuur chuur hai patthar kahāñ gayā

rauzan khulā thā dil kā havā.eñ bhī aa.ī thiiñ

lekin qarīb-tar thā jo dilbar kahāñ gayā

ik vo ki jis ko fursat lutf-o-karam nahīñ

ik maiñ ki sochtā huuñ sitamgar kahāñ gayā

siine se us kā haath haTānā muhāl thā

jaate hue vo haath hilā kar kahāñ gayā

pahle yahī taḌap thī ki dastār kyuuñ girī

aur ab ye sochtā huuñ mirā sar kahāñ gayā

ghar meñ huuñ aur soch rahā huuñ na jaane kyuuñ

dīvār-o-dar vahī haiñ mirā ghar kahāñ gayā

sāhil pe aa ke sochnā 'anjum' fuzūl hai

kashtī kahāñ ga.ī vo samundar kahāñ gayā

shaffaf sath-e-ab ka manzar kahan gaya

aaina chur chur hai patthar kahan gaya

rauzan khula tha dil ka hawaen bhi aai thin

lekin qarib-tar tha jo dilbar kahan gaya

ek wo ki jis ko fursat lutf-o-karam nahin

ek main ki sochta hun sitamgar kahan gaya

sine se us ka hath haTana muhaal tha

jate hue wo hath hila kar kahan gaya

pahle yahi taDap thi ki dastar kyun giri

aur ab ye sochta hun mera sar kahan gaya

ghar mein hun aur soch raha hun na jaane kyun

diwar-o-dar wahi hain mera ghar kahan gaya

sahil pe aa ke sochna 'anjum' fuzul hai

kashti kahan gai wo samundar kahan gaya