shaghl mai chhoDiye uTh aaiye mai-KHanon se

shaġhl mai chhoḌiye uTh aa.iye mai-ḳhānoñ se

sho.ale kuchh duur nahīñ aap ke aivānoñ se

dekhnā rañg-e-gulistāñ hī badal Dāleñge

ab ke palTe jo ye dīvāne bayābānoñ se

mutma.in aap na hoñ bhej ke zindāñ meñ hameñ

inqilābāt uThā karte haiñ zindānoñ se

vaqt kī baat qafas meñ bhī Thikāna na rahā

ho chalā thā hameñ jab uns nigahbānoñ se

sāġhar-e-zabt chhalakne ko hai ai ahd shikan

dil bahaltā nahīñ TuuTe hue paimānoñ se

na mohabbat na muravvat na hamiyyat na ḳhulūs

aaj insāñ nazar aate nahīñ insānoñ se

aag ye kis ne bahāroñ meñ lagā dī 'at.har'

uTh rahā hai ye dhuāñ kaisā gulistānoñ se

shaghl mai chhoDiye uTh aaiye mai-KHanon se

shoale kuchh dur nahin aap ke aiwanon se

dekhna rang-e-gulistan hi badal Dalenge

ab ke palTe jo ye diwane bayabanon se

mutmain aap na hon bhej ke zindan mein hamein

inqilabaat uTha karte hain zindanon se

waqt ki baat qafas mein bhi Thikana na raha

ho chala tha hamein jab uns nigahbanon se

saghar-e-zabt chhalakne ko hai ai ahd shikan

dil bahalta nahin TuTe hue paimanon se

na mohabbat na murawwat na hamiyyat na KHulus

aaj insan nazar aate nahin insanon se

aag ye kis ne bahaaron mein laga di 'athar'

uTh raha hai ye dhuan kaisa gulistanon se