shaguftagi-e-dil-e-viran mein aaj aa hi gai

shaguftagī-e-dil-e-vīrāñ meñ aaj aa hī ga.ī

ghaTā chaman pe bahāroñ ko le ke chhā hī ga.ī

hayāt-e-tāza ke ḳhatroñ se dil dhaḌaktā thā

havā chalī to kalī phir bhī muskurā hī ga.ī

naqāb meñ bhī vo jalve na qaid ho paa.e

kiran diloñ ke añdhere ko jagmagā hī ga.ī

taġhāful ek bharam thā ġhurūr-e-jānāñ kā

mirī nigāh-e-mohabbat kā ramz pā hī ga.ī

mutālbe to bahut saḳht the zamāne ke

magar huqūq-e-mohabbat kī yaad aa hī ga.ī

mire junūñ kī ḳhalish se ab aur kyā hotā

sukūt-e-ahl-e-ḳhirad ko to aazmā hī ga.ī

matā-e-qalb-o-nazar ḳhaak hote hote bhī

jahān-e-husn kī kuchh aabrū baḌhā hī ga.ī

thapak thapak ke sulāyā jo tum ne zauq-e-suḳhan

'surūr' is ko kisī kī nazar jagā hī ga.ī

shaguftagi-e-dil-e-viran mein aaj aa hi gai

ghaTa chaman pe bahaaron ko le ke chha hi gai

hayat-e-taza ke KHatron se dil dhaDakta tha

hawa chali to kali phir bhi muskura hi gai

naqab mein bhi wo jalwe na qaid ho pae

kiran dilon ke andhere ko jagmaga hi gai

taghaful ek bharam tha ghurur-e-jaanan ka

meri nigah-e-mohabbat ka ramz pa hi gai

mutalbe to bahut saKHt the zamane ke

magar huquq-e-mohabbat ki yaad aa hi gai

mere junun ki KHalish se ab aur kya hota

sukut-e-ahl-e-KHirad ko to aazma hi gai

mata-e-qalb-o-nazar KHak hote hote bhi

jahan-e-husn ki kuchh aabru baDha hi gai

thapak thapak ke sulaya jo tum ne zauq-e-suKHan

'surur' is ko kisi ki nazar jaga hi gai