shah-e-rag se bhi tu qarib hai tera ye karam hai kamal hai

shah-e-rag se bhī tū qarīb hai tirā ye karam hai kamāl hai

ye jo ḳhaak meñ bhī hai raushnī tirā aks-e-rū-e-jamāl hai

ise chāhatoñ kā kahūñ asar ki tū saath mere hai har Dagar

tujhe zarre zarre kī hai ḳhabar ki tū aap apnī misāl hai

mirī ḳhaak kyā mirī zaat kyā mirā 'aks tak hai finā-sifat

tire tāj-e-shāhī kī baat kyā na fanā use na zavāl hai

ye jo 'āshiqī kī hai rahguzar hai bahut kaThin mire ham-safar

na rakheñ sambhal ke qadam agar chale vaqt ulTī hī chaal hai

tire qurb meñ bhī haiñ dūriyāñ tirā kuchh 'ajab sā sulūk hai

vo sukūñ jo thā tire qurb meñ vahī aaj ḳhvāb-o-ḳhayāl hai

vo rafīq kitnā badal gayā na kare hai zikr kabhī mirā

use kyā huā use kyā huā mire zehn meñ ye savāl hai

vo sharārteñ vahī shoḳhiyāñ mire ahd-e-tifl ke qahqahe

kahīñ kho ga.e mire rāt-din isī baat kā to malāl hai

vo Darī Darī sī mohabbateñ ki haiñ yaad mujh ko vo sā.ateñ

vo jo chāhatoñ meñ thiiñ lazzateñ vo ḳhayāl-e-jāñ kā vabāl hai

usī chārāgar kī talāsh hai kare manziloñ ko jo rū-ba-rū

usī rahnumā kī hai justujū usī rāhbar kā savāl hai

thiiñ jo qurbateñ bane fāsle vo kahāñ haiñ pahle se silsile

nahīñ sahl 'ishq ke marhale tire ā.īne meñ jo baal hai

koī ḳhvāb hai ki gumān hai ye jo zikr-e-kaun-o-makān hai

jo ye 'shamsa' husn-e-bayān hai tire rab kā baḳhshā kamāl hai

shah-e-rag se bhi tu qarib hai tera ye karam hai kamal hai

ye jo KHak mein bhi hai raushni tera aks-e-ru-e-jamal hai

ise chahaton ka kahun asar ki tu sath mere hai har Dagar

tujhe zarre zarre ki hai KHabar ki tu aap apni misal hai

meri KHak kya meri zat kya mera 'aks tak hai fina-sifat

tere taj-e-shahi ki baat kya na fana use na zawal hai

ye jo 'ashiqi ki hai rahguzar hai bahut kaThin mere ham-safar

na rakhen sambhal ke qadam agar chale waqt ulTi hi chaal hai

tere qurb mein bhi hain duriyan tera kuchh 'ajab sa suluk hai

wo sukun jo tha tere qurb mein wahi aaj KHwab-o-KHayal hai

wo rafiq kitna badal gaya na kare hai zikr kabhi mera

use kya hua use kya hua mere zehn mein ye sawal hai

wo shararten wahi shoKHiyan mere ahd-e-tifl ke qahqahe

kahin kho gae mere raat-din isi baat ka to malal hai

wo Dari Dari si mohabbaten ki hain yaad mujh ko wo saaten

wo jo chahaton mein thin lazzaten wo KHayal-e-jaan ka wabaal hai

usi chaaragar ki talash hai kare manzilon ko jo ru-ba-ru

usi rahnuma ki hai justuju usi rahbar ka sawal hai

thin jo qurbaten bane fasle wo kahan hain pahle se silsile

nahin sahl 'ishq ke marhale tere aaine mein jo baal hai

koi KHwab hai ki guman hai ye jo zikr-e-kaun-o-makan hai

jo ye 'shamsa' husn-e-bayan hai tere rab ka baKHsha kamal hai