shahr mein lakh charaghan ho to kya hota hai

shahr meñ laakh charāġhāñ ho to kyā hotā hai

mere ghar meñ vahī miTTī kā diyā hotā hai

dard siine meñ mire jab bhī mahak uThtā hai

zaḳhm yādoñ kā tirī aur harā hotā hai

dāstāñ ġham kī sināoñ ye zarūrī to nahīñ

nafs-e-mazmūn to chehre pe likhā hotā hai

shiddat-e-ġham se na miT jaa.e kahīñ merā vajūd

roz ik ġham mirī chaukhaT pe khaḌā hotā hai

qatl kartā hai vo har roz mujhe qistoñ meñ

mere ehsās meñ jo dard chhupā hotā hai

terī mahfil se nikal jā.ūñ yahī achchhā hai

yahāñ har roz nayā hashr bapā hotā hai

ġharq ho jaa.e na kashtī kahīñ Dar se 'ārif'

nāḳhudā kahtā hai mañjdhār se kyā hotā hai

shahr mein lakh charaghan ho to kya hota hai

mere ghar mein wahi miTTi ka diya hota hai

dard sine mein mere jab bhi mahak uThta hai

zaKHm yaadon ka teri aur hara hota hai

dastan gham ki sinaon ye zaruri to nahin

nafs-e-mazmun to chehre pe likha hota hai

shiddat-e-gham se na miT jae kahin mera wajud

roz ek gham meri chaukhaT pe khaDa hota hai

qatl karta hai wo har roz mujhe qiston mein

mere ehsas mein jo dard chhupa hota hai

teri mahfil se nikal jaun yahi achchha hai

yahan har roz naya hashr bapa hota hai

gharq ho jae na kashti kahin Dar se 'arif'

naKHuda kahta hai manjdhaar se kya hota hai