shahr parbat bahr-o-bar ko chhoDta jata hun main

shahr parbat bahr-o-bar ko chhoḌtā jaatā huuñ maiñ

ik tamāshā ho rahā hai dekhtā jaatā huuñ maiñ

hosh uḌtā jā rahā hai garmī-e-raftār meñ

dekhtā jaatā huuñ maiñ aur bhūltā jaatā huuñ maiñ

abr hai aflāk par aur ik sarāsīma qamar

ek dasht-e-rā.egāñ meñ dauḌtā jaatā huuñ maiñ

huuñ makāñ meñ band jaise imtihāñ meñ aadmī

saḳhtī-e-dīvār-o-dar hai jheltā jaatā huuñ maiñ

nam hai mere she'r se us chashm-e-sañg-ālūd meñ

ḳhvāb huuñ us chashm-e-tar meñ phailtā jaatā huuñ maiñ

shauq haiñ kuchh jin ke pīchhe chal rahā huuñ maiñ 'munīr'

rañj haiñ kuchh dil meñ mere khīñchtā jaatā huuñ maiñ

shahr parbat bahr-o-bar ko chhoDta jata hun main

ek tamasha ho raha hai dekhta jata hun main

hosh uDta ja raha hai garmi-e-raftar mein

dekhta jata hun main aur bhulta jata hun main

abr hai aflak par aur ek sarasima qamar

ek dasht-e-raegan mein dauDta jata hun main

hun makan mein band jaise imtihan mein aadmi

saKHti-e-diwar-o-dar hai jhelta jata hun main

nam hai mere she'r se us chashm-e-sang-alud mein

KHwab hun us chashm-e-tar mein phailta jata hun main

shauq hain kuchh jin ke pichhe chal raha hun main 'munir'

ranj hain kuchh dil mein mere khinchta jata hun main