shahid-e-ishq hue qais namwar ki tarah

shahīd-e-ishq hue qais nāmvar kī tarah

jahāñ meñ aib bhī ham ne kiye hunar kī tarah

kuchh aaj shaam se chehra hai faq sahar kī tarah

Dhalā hī jaatā huuñ furqat meñ dopahar kī tarah

siyāh-baḳhtoñ ko yuuñ baaġh se nikāl ai charḳh

ki chaar phuul to dāman meñ hoñ sipar kī tarah

tamām ḳhalq hai ḳhvāhān-e-ābrū ai rab

chhupā mujhe sadaf-e-qabr meñ guhar kī tarah

tujhī ko dekhūñgā jab tak haiñ barqarār āñkheñ

mirī nazar na phiregī tirī nazar kī tarah

hamārī qabr pe kyā ehtiyāj-e-ambar-o-ūd

sulag rahā hai har ik ustuḳhvāñ agar kī tarah

nahīf-o-zār haiñ kyā zor bāġhbāñ se chale

jahāñ biThā diyā bas rah ga.e shajar kī tarah

tumhāre halqa-ba-goshoñ meñ ek ham bhī haiñ

paḌā rahe ye suḳhan kaan meñ guhar kī tarah

'anīs' yuuñ huā hāl-e-javānī-o-pīri

baḌhe the naḳhl kī sūrat gire samar kī tarah

shahid-e-ishq hue qais namwar ki tarah

jahan mein aib bhi hum ne kiye hunar ki tarah

kuchh aaj sham se chehra hai faq sahar ki tarah

Dhala hi jata hun furqat mein dopahar ki tarah

siyah-baKHton ko yun bagh se nikal ai charKH

ki chaar phul to daman mein hon sipar ki tarah

tamam KHalq hai KHwahan-e-abru ai rab

chhupa mujhe sadaf-e-qabr mein guhar ki tarah

tujhi ko dekhunga jab tak hain barqarar aankhen

meri nazar na phiregi teri nazar ki tarah

hamari qabr pe kya ehtiyaj-e-ambar-o-ud

sulag raha hai har ek ustuKHwan agar ki tarah

nahif-o-zar hain kya zor baghban se chale

jahan biTha diya bas rah gae shajar ki tarah

tumhaare halqa-ba-goshon mein ek hum bhi hain

paDa rahe ye suKHan kan mein guhar ki tarah

'anis' yun hua haal-e-jawani-o-piri

baDhe the naKHl ki surat gire samar ki tarah