shahr-ba-shahr kar safar zad-e-safar liye baghair

shahr-ba-shahr kar safar zād-e-safar liye baġhair

koī asar kiye baġhair koī asar liye baġhair

koh-o-kamar meñ ham-safīr kuchh nahīñ ab ba-juz havā

dekhiyo palaTiyo na aaj shahr se par liye baġhair

vaqt ke ma.arke meñ thiiñ mujh ko ri.āyateñ havas

maiñ sar-e-ma.arka gayā apnī sipar liye baġhair

kuchh bhī ho qatl-gāh meñ husn-e-badan kā hai zarar

ham na kahīñ se ā.eñge dosh pe sar liye baġhair

qarya-e-girya meñ mirā girya hunar-varāna hai

yaañ se kahīñ Talūñgā maiñ dād-e-hunar liye baġhair

us ke bhī kuchh gile haiñ dil un kā hisāb tum rakho

diid ne us meñ kī basar us kī ḳhabar liye baġhair

us kā suḳhan bhī jā se hai aur vo ye ki 'jaun' tum

shohra-e-shahar ho to kyā shahr meñ ghar liye baġhair

shahr-ba-shahr kar safar zad-e-safar liye baghair

koi asar kiye baghair koi asar liye baghair

koh-o-kamar mein ham-safir kuchh nahin ab ba-juz hawa

dekhiyo palaTiyo na aaj shahr se par liye baghair

waqt ke marke mein thin mujh ko riayaten hawas

main sar-e-marka gaya apni sipar liye baghair

kuchh bhi ho qatl-gah mein husn-e-badan ka hai zarar

hum na kahin se aaenge dosh pe sar liye baghair

qarya-e-girya mein mera girya hunar-warana hai

yan se kahin Talunga main dad-e-hunar liye baghair

us ke bhi kuchh gile hain dil un ka hisab tum rakho

did ne us mein ki basar us ki KHabar liye baghair

us ka suKHan bhi ja se hai aur wo ye ki 'jaun' tum

shohra-e-shahar ho to kya shahr mein ghar liye baghair