shahr-badari ke din guzar jate

shahr-badarī ke din guzar jaate

kitnā achchhā thā log ghar jaate

aan de kar ke jaan laa.e ho

kyā ye lāzim nahīñ thā mar jaate

hukm nāfiz thā apne ghar meñ raho

be-gharī ham batā kidhar jaate

mohtasib ne baḌī hī jaldī kī

ain mumkin thā ham sudhar jaate

umr jaisī guzār dī ham ne

tum ko miltī to kab ke mar jaate

hā.e-re iltifāt-e-chārāgar

zaḳhm gahre nahīñ the bhar jaate

log kuchh dekh kar ThiTakte the

aur kuchh soch kar guzar jaate

khā ga.e rog āgahī vaale

varna ḳhush-bāsh din guzar jaate

dil talak aan kar ruke sab khel

kyā mazā thā jo is meñ sar jaate

bair le kar bhī saarī duniyā ke

ik tujhe ham-ḳhayāl kar jaate

nā shu.ūrī meñ ḳhush thī duniyā 'shams'

ham bhī ai kaash be-ḳhabar jaate

shahr-badari ke din guzar jate

kitna achchha tha log ghar jate

aan de kar ke jaan lae ho

kya ye lazim nahin tha mar jate

hukm nafiz tha apne ghar mein raho

be-ghari hum bata kidhar jate

mohtasib ne baDi hi jaldi ki

ain mumkin tha hum sudhar jate

umr jaisi guzar di hum ne

tum ko milti to kab ke mar jate

hae-re iltifat-e-chaaragar

zaKHm gahre nahin the bhar jate

log kuchh dekh kar ThiTakte the

aur kuchh soch kar guzar jate

kha gae rog aagahi wale

warna KHush-bash din guzar jate

dil talak aan kar ruke sab khel

kya maza tha jo is mein sar jate

bair le kar bhi sari duniya ke

ek tujhe ham-KHayal kar jate

na shuuri mein KHush thi duniya 'shams'

hum bhi ai kash be-KHabar jate