shahr bhar mein kahin raunaq thi na tabani thi

shahr bhar meñ kahīñ raunaq thī na tābānī thī

har taraf chhā.ī huī gard-e-pareshānī thī

jab sarāboñ pe qanā.at kā salīqa aayā

ret ko haath lagāyā to vahīñ paanī thī

sāda-lauhī mirī rakhtī thī tavaqqo.a tujh se

mujh se ummīd lagā.e tirī nādānī thī

kyā batā.ūñ ki use dekh ke hairāñ kyuuñ huuñ

ek ā.īna thā ā.īne meñ hairānī thī

ab nadāmat ke samundar meñ lagā.eñ ġhote

ārzūoñ ne kahāñ baat mirī maanī thī

muḳhtasar us ko kiyā hai mutabassim ho kar

varna rūdād mire dard kī tūlānī thī

ai 'muzaffar' mujhe tā-umr rahī fikr-e-suḳhan

jab ki fursat thī mayassar na tan-āsānī thī

shahr bhar mein kahin raunaq thi na tabani thi

har taraf chhai hui gard-e-pareshani thi

jab sarabon pe qanaat ka saliqa aaya

ret ko hath lagaya to wahin pani thi

sada-lauhi meri rakhti thi tawaqqoa tujh se

mujh se ummid lagae teri nadani thi

kya bataun ki use dekh ke hairan kyun hun

ek aaina tha aaine mein hairani thi

ab nadamat ke samundar mein lagaen ghote

aarzuon ne kahan baat meri mani thi

muKHtasar us ko kiya hai mutabassim ho kar

warna rudad mere dard ki tulani thi

ai 'muzaffar' mujhe ta-umr rahi fikr-e-suKHan

jab ki fursat thi mayassar na tan-asani thi