شہر دل ایسا کہ حیراں تھی طلسمات کی گرد

شہر دل ایسا کہ حیراں تھی طلسمات کی گرد

جم گئی جس کے در و بام پہ خدشات کی گرد

ایک ہی نام فقط مجھ کو دکھائی دیا ہے

صاف کرتا رہا اک عمر میں صفحات کی گرد

میں نے کچھ شہروں میں یوں خاک اڑی دیکھی ہے

جان لے کچھ بھی نہیں تیرے مضافات کی گرد

اب کوئی گرد بھی ہو مجھ کو ذرا فرق نہیں

آنکھ میں جب سے پڑی تیرے اشارات کی گرد

تیرے اعمال کہ جس طرح ریا کاری کی دھول

تیرے افکار کہ ہو جیسے تضادات کی گرد

گاؤں میں امن سے رہتے ہیں وفا کرتے ہیں

شکر ہے ہم پہ نہیں پڑتی محلات کی گرد

اب مجھے تو ہی بتا کیسے تجھے دیکھتا میں

چار سو اڑتی رہی تیرے خیالات کی گرد